نصائح علشان ايميلك مايتسرقش

بعد ما ناس كتير أوي أعرفهم ايميلاتهم اتسرقت و بقوا محتاسين قلت اكتب بوست عن الموضوع ده

أولاً : خلي الباسوورد صعب
يعني مش تخليه رقم تليفونك ولا تاريخ ميلادك ولا كل الكلام الفاضي ده
خليه مكون من أرقام و حروف و كمان لو تحط الرموز اللي زي دي
! @ # $ % ^ &
كده يبقى ايميلك ميه ميه
ممكن تخليه جملة انت بتحبها مع رقم انت فاكره و كمان عليه كام رمز من دول

ثانياً : خلي بالك من السؤال السري
Secret Question
و ده مهم جداً في حالة ان ايميلك اتسرق
بعض أصدقائي عرفت منهم انهم بيكتبوا أي حاجة لأنهم فاكرين ان ده مش مهم
افتكر كويس السؤال و الإجابة بتاعته
و خلي بالك لأن ساعات ممكن تلاقي حد ضافك على الماسينجر و بعد ما يتكلم معاك كام يوم هاتلاقيه سألك السؤال السري و كأنه بيسألك عادي إنما الحقيقه انه عاوز يعرفه علشان يسرق الايميل
علشان كده لازم تبقى فاكر السؤال و متقولش إجابته لأي حد

ثالثاً : لو بتدخل من نت كافي
بعض المرضى النفسيين بينزلوا على الأجهزة برامج بتسجل كل زرار بتدوس عليه و ممكن يسجلوا الايميل و الباسوورد بتوعك و يسرقوهم و دي منتشرة حالياً
دي حلها تضغط على
Ctrl+Alt+Delete
و شوف البرامج اللي شغاله و أي اسم غريب اعمله
End Process Tree
طبعاً كلمة اسم غريب هنا معناها انك عارف أو بتشبه على برامج الويندوز او برامج الحماية بدل ما تقفلها هي كمان
و على فكرة في برامج كتير من النوع ده برامج الحماية مش بتعرف تقفشهم

حل برنساوي جداً
في أداه موجوده في الويندوز اسمها
On Screen Keyboard
استخدمها و ريح نفسك
from start menu click Run then type osk and press enter
or from Start menu-->Accessories-->Accessibility-->On-Screen Keyboard
البرنامج ده بيكتب من جوه الويندوز فالبرامج مش بتسجل
استخدم البرنامج ده في كتابة الباسوورد و الايميل كفاية

لو الجهاز اللي انت قاعد عليه موجود فيه برنامج ديب فريز اطمئن احتمال كبير ميكونش فيه برامج تجسس
و ممكن تبقى تنزل برنامج ديب فريز عندك في البيت لو العملية ضاربه عندك و خايف على جهازك من البرامج دي

رابعاً: لو بتنزل كراكات أو برامج مضروبة
ليه كده بس حرام عليكوا مجهود الناس اللي انتوا بتسرقوه ده
هههههه
المهم في الفترة الأخيرة بقت هواية عند الناس اللي بيفتحوا مواقع كراكات انهم يحطوا مع كل كراك ملف تنفيذي عليه برنامج تجسس زي اللي قلنا عنها فوق برده
في حالات كتير برامج الحماية مش بتعرف تقفشه لأنه بيكون عامل زي البرنامج العادي
لما تفتح الملف المضغوط اللي فيه الكراك هتلاقي ملف تنفيذي أو أكتر
طلع الملفات كلها من الملف المضغوط و شوف الأيقونات بتاعتهم و عموماً هتلاقي دائماً الملفات اللي انت عاوزها مكتوب في اسمها حاجة عن اسم الفريق اللي عمل الكراك

يعني الفكرة كلها انكوا تخلوا بالكوا و مش كل حاجة تيجي تشغلوها على طول

خامساً : لو بتستخدم أي برنامج للإيميل زي
Outlook or Thunderbird
اتأكد ان عندك برنامج حماية جامد و انا بارشحلكوا
NOD32
و كمان اتأكد ان قاعدة البيانات بتاعت الفيروسات فيه محدثة

ده كل اللي عندي دلوقتي و لو افتكرت حاجة تانية هاكتبها ان شاء الله
سلام

أسبوع تعذيب شباب الجامعات - الجزء الثالث

الخامسة و النصف صباحاً

صوت الموسيقى اللي بيصحوا بيها العساكر في الجيش (راجع فيلم اسماعيل يس في البحرية)
الدنيا مقلوبة
الكل بيجري في كل حته
المشرفين بيزعقوا في كل اوده
اصحوا اصحوا خلصوا
!!!!!!
قايم من النوم و عينيا معمصة : هو فيه ايه ؟؟؟
الريس هاييجي النهاردة
البسوا بسرعة و لو هاتتأخروا في الفطار متفطروش
طب احنا عاوزين نقعد (مش ناقصين وجع دماغ)
ممنوع حد يفضل موجود
ممنوع تجيبوا معاكوا مفاتيح أو أي حاجة معدنية
ممنوع تجيبوا معاكوا موبايلات
ليه هما مش بيوقعوا شبكة الموبايل لما الريس بييجي
المشرف مفهمش انا باقول ايه أصلاً
(بعصبية) قلت ممنوع الموبايلات و خلاص و ده مش كلامي أنا خلصوا و البسوا حالاً
طب نصلي الأول
(بعصبية أكثر) صلي ياخويا.....صلي بس خلصنا في يومك ده
خرج المشرف علشان يزعق في أوده تانية
صلينا و لبسنا هدومنا
اضطريت البس الكوتشي بتاع الجامعة (أديداس مضروب) و ضيق جداً عليا
نزلنا و المشرف لسه بيزعق و بينبه تاني على المفاتيح و الحاجات المعدنية و الموبيلات
فطرنا بسرعة و ركبنا الميكروباصين المعفنين بتوعنا و اتحشرنا فيهم لأنهم خافوا حتى يخرجوا بالعربية النص نقل
البلد فاضيااااااااااااااااااااااااااا
مفيش غير بتوع الأمن و الطلبة بتوع الأسبوع و بس
وصلنا عند إستاد الجامعة و الدنيا زحمة جداً من الطلبة و الأمن
فضلنا واقفين أكتر من ساعة مستنيين دورنا ييجي علشان ندخل و نتفتش أو بمعنى أدق نتفتش و ندخل
واقفين و مفيش حاجة حصلت
بدأنا نهزر و نلعب بالأعلام و نتريق على هدوم البنات اللي في العرض اللي كانوا واقفين بره
بدأنا نقول نكت
واحد صاحبنا جه يقول نكتة و لسه بيقول : مرة الريس و مكملش
و كلنا ضحكنا بصوت عالي قوي
المشرفين زعقوا بشدة و غباء
نده الراجل على جامعتنا علشان نتفتش
الناس بتتفتش و الراجل بيراجع الأسامي
الراجل فتشني و زملائي بس الورقة اللي فيها أسامي بعض الناس و منهم العبد لله مقطوعة
أنا آسف ممنوع تدخلوا لازم الاقي ورقتكوا
بس احنا معانا IDs
و انا مقدرش ادخلكوا الا لما الاقي اسمائكوا
المشرفين باعونا و دخلوا
- روحوا انتوا يا ولاد
- هو مش كان ممنوع الصبح ؟
خلاص بأه هانعمل ايه -
قشطة هانروح
واحد من المشرفين بتوعنا نسي و جاب الموبايل بتاعه و طبعاً مرضيوش يدخلوه
قالنا طالما هاتروحوا خدوا الموبايل بتاعي معاكوا و مضى في سبيله
جينا نروح الراجل ندهلنا و قالنا خلاص ادخلوا
و بما اننا اتفتشنا قبل كده الراجل مفتشتناش تاني
و عدينا من الميتال ديتيكتور و مشافش الموبايل
!!!!!!!!!!
دخلنا في طريق ضيق قوي و اللي مضيقه عربيات التليفزيون
و فضلنا ماشيين في طريق مليان بتوع أمن لابسين مدني ماسكين في ايديهم سلاح تقريباً
AK-103 or SMG
ده لو كنت فاكر كويس
نقطة تفتيش تانية قبل السلم اللي بنطلع منه على المدرجات
المرة ده التفتيش (أعمق) حبتين تلاتة أربعة خمسة
و فيه ميتال ديتيكتور تاني
هانعدي بالموبايل ازاي؟؟؟؟
السلم اللي بيودي على المدرجات فيه حته كده فتحة كبيرة عند كل دور و كان فيه طوب كتير و حاجات واضح انها باقية من تجديد للإستاد و الطوب ده واصل لغاية الفتحة اللي في الدور الأول و فيه عسكري واقف في الدور ده بسبب الطوب
يمكن حد يناول حد تاني صاروخ ولا حاجة أو حد ينط من غير ما يتفتش
المهم اننا شفنا المشرف بتاع الموبايل في أول دور ندهناله و اديناله الموبايل من الفتحة دي و العسكري واقف زي المسطول
و عدينا من تاني نقطة تفتيش اللي كانت منيلة بنيلة
و طلعنا و لقينا الكراسي في غاية القذارة قمنا قعدنا ننضف
و فضلنا قاعدين
و قاعدين
و قاعدين
- هو الريس مش هاييجي ولا ايه؟؟؟؟
- هو برده في أسبوع شباب الجامعات اللي فات اتأخر برده و قالوا انه مش هاييجي و بعد كده جه
راجع المقال ده
و فضلنا قاعدين
و قاعدين
و جه وزير الداخلية
و بعد حبه
رئيس الوزراء
و الغريب ان الناس بتسقف بحرارة للناس دي
وفضلنا قاعدين
و قاعدين
...........
ملل ملل ملل
دوشة و صوت عربيات كتييييير كلها شغالة سرينة شرطة
السيد رئيس الجمهورية وصل
و اتقلب الاستاد تسقيف
و أنا أعااااااااااااااايط
أصل الجزمة ضيقة قوي
السلام الوطني
الناس قعدت
بدأ العرض
عرض منيل بستين نيلة و مليان أخطاء و بلاوي زرقا و نفاق
و اخترناك و اخترنا لك
و بعد كده بدأ كل واحد عاوز يقول كلمتين يقولهم
اللي فاكرهم هما رئيس جامعة المنوفية و المحافظ
مليانيين أخطاء نحوية و غير كده كمان مش عارفين يقروا الخطابات عدل
و في كلمة المحافظ قعد ينطق فيها و يغلط أكتر من ست سبع مرات
و كلمة تانية رئيس جامعة المنوفية قعد برده يغلط فيها
انا ساعتها افتكرت كلمة ستنتنضم اللي قالها سعيد صالح
و الكلام كله نفاق مقزز وواضح و منيل بنيلة
و حسيت بغثيان من فرط النفاق....أي والله العظيم
(تقريباً كده كان الكلام الأول بعد كده العرض) بس انا مش فاكر كويس
المهم انا كنت باتحدى العيال ان خطاب الرئيس هايكون قليل جداً لأني سمعت انه ميقدرش يقف اكتر من ربع ساعة متواصلة
الناس مش مصدقة
كلمة الرئيس : "بسم الله الرحمن الرحيم أفتتح أسبوع شباب الجامعات بجامعة المنوفية"...خلاص

وبعد العرض ما خلص و اللي عنده حاجة قالها الريس مشي و بعدها بكتييييييير سمحولنا نمشي بس مفيش عربيات توصلنا و اضطرينا نمشي في الشارع على رجلينا المشوار الطويل ده و الجزمة ضيقة و كان هايغمى عليا من التعب
ممنوع ان اي حد يمشي من أهل البلد بس احنا علشان لابسين هدوم الجامعات و معانا الآيديهات سايبينا ماشيين
البلد عاملة زي ما تكون ثكنة عسكرية أو منطقة تحت الإحتلال
عساكر في كل حته
أي حد لابس مدني يبقى معاه لاسلكي
سلاح مع كل واحد
رجعنا بعد فترة مشي طويلة جدا جدا جداً
دعيت على كل الناس في اليوم ده لأن رجلي ورمت و و مقدرتش امشي عليها بقيت اليوم كويس
كل ده علشان الريس هايحضر الحفلة؟؟؟؟؟؟؟؟
استعدوا علشان بكرة المسابقات هاتبدأ
طيب

نفس اللي حصل زي امبارح في نهاية اليوم
في المرات اللي جاية هاكتب عن أهم الأحداث يعني ممكن ألخص يومين في بوست واحدة
انا عارف ان اسلوب السرد عندي غريب المرة دي بس انا فعلاً كل ما فاتكر اليوم ده باتفقع
سلاحف

أسبوع تعذيب شباب الجامعات - الجزء الثاني

الجمعة
صحيت الفجر على صوت موسيقى صادرة من مناخير واحد صاحبنا و صحي واحد تاني و هو عمال يقول
Music.....Music....
نزلنا و صلينا و طلعنا نشتغل شوية
النور قطع.....قلنا بيوفروا لأن نور ربنا موجود
و بعد فترة النور رجع و نزلنا نفطر و بصراحة الفطار بتاعهم كويس
فول و جبنه بيضا و بيضه مسلوقة و حلاوة و علبة لبن و شاي
و بعد ما طلعنا قالولنا بعد الصلاة نجهز نفسنا علشان "الكرنفال" بعد الصلاة
كرنفال ايه؟؟؟
المهم صلينا الجمعة تحت المطر و طلعنا نلبس علشان "الكرنفال" و جامعتنا بنت اللذين جايبلنا ميكروباصات للإنتقالات الداخلية في المنوفية و اللي طبعاً مكفتش الناس كلها و اضطر البعض انهم يركبوا على عربية نص نقل
وصلنا الاستاد ووزعوا أعلام الجامعة و أعلام مصر و انا ساعتها افتكرت انهم هايعملوا بروفة لعرض الرئيس
طلع انهم عاملين عرض بأن كل الجامعات المشاركة تلف شبين كلها بالأعلام بتاعتها
ياولاد الإييييييييييه
طبعاً عندنا ماقلولناش على كده لأننا كنا مش هاننزل
و سمعنا تعليقات و تريقة من الناس في الشارع وواحد فيهم لسه فاكره قاللنا : "بتتريقوا على المنايفة؟؟ اتريقوا بقى على المنايفه دلوقتي"
الرجال عارف اننا متكدرين و فرحان فينا
و الناس كانت عمالة تصورنا و تضحك علينا و الستات تزغرط و العيال بتسقف و كأننا في عرض عسكري قبل الحرب
بعد شوية من المشي زهقنا قمنا قعدنا نهزر و نضرب بعض بالأعلام و نكعبل بعض و طبعاً المطرة كانت شغالة و الهدوم بقت طين
و عبارات الترحيب متعلقة بطول و عرض المنوفية للترحيب بالرئيس اللي فاكره منها:
"مرحباً بك في الدار أيها القائد المغوار"
"أهلاً بك في بلدك الثاني"!!!
و غيرها كتير (هاكتب الباقي لما أفتكر)
و بعد وقت طويييييييييل لقينا اننا خلصنا و رجعنا المدينة تعبانين و هلكانين
اتغدينا و رجعنا و بعد شوية قالولنا ان رئيس جامعتنا جه علشان يقابلنا و يشوف أحوالنا و كده
نزلنا و بدأ يتكلم لو عندنا مشاكل أو محتاجين حاجة
طبعاً كانت أول مشكلة اننا معترضين على الأماكن اللي احنا فيها و بصراحة ده كان غباء من اللي بيسأل يعني هو هايعمل ايه في دي
و طبعاً كان الرد ان دي امكانيات الجامعة و معلش و مش عارف ايه
و بعد كده سألوا عن البدل اللي الجامعة بتصرفه و المفروض ان الجامعة بتدي بدل 20 جنيه يومياً و البدل ده كان الطلبة بياخدوه في آخر 3 أيام و المطلوب اننا ناخد البدل ده في أول الأسبوع و ساعتها رئيس الجامعة قال: " و أنا أضمن منين ان الطالب يقعد لآخر يوم يمكن يخلص مسابقاته و يروح" و المشرف اللي كان بيكلمه قاله ان البدل ده لتمثيل الطالب لجامعته و مش عارف و كلام من ده
رئيس الجامعة عمل نفسه اقتنع و أمر بصرف البدل مع ان كان باين انه صعبان عليه الفلوس اللي هاناخدها
و الطلبة بعد كده اتكلمت ان دايماً الجامعة المنظمة بتاخد المركز الأول في أغلب المسابقات و ان لجان التحكيم بتجاملهم و كان الرد من رئيس الجامعة ان ده شىء عادي و ان المجاملة دي مش شىء وحش و انه فعلاً كل جامعة بتنظم الأسبوع لازم تاخد المركز الأول
و نائب رئيس الجامعة قال بعدها اننا لازم نقول اننا قريبين من كفر مصيلحة اللي هي بلد الريس..... يا سلام ؟ ماهي كل الجامعات قاعدة معانا في نفس المكان و نقول لمين أصلاً الكلام ده ؟
و بعد كده البنات وصلوا من مدينة الطلبة علشان يتكلموا مع رئيس الجامعة هما كمان قمنا خدنا العشاء و طلعنا
و بعد شوية المشرفين جم يقبضونا البدل و نبهوا علينا اننا كلنا هانصحى الساعة 5 و نص صباحاً علشان نروح العرض بتاع الريس و ان ممنوع حد يفضل في المدينة و ممنوع نخرج من المدينة خالص النهاردة لأن البلد هاتتسلم لتأمينها و تمشيطها و تنطيطها علشان زيارة بكرة
و انتهى اليوم مع مقطوعة جديدة من صاحبنا الموسيقي اللي راح في النوم قبلنا

أسبوع تعذيب شباب الجامعات - الجزء الأول

هنا هاحاول أكتب كل اللي انا فاكره من المواقف اللي حصلت في الأسبوع و بما إن أفكاري مش مرتبة على طول فأرجوا انكم تستحملوا عدم الترتيب ده
وصلنا المنوفية بعد ما فضلنا مستنيين الأتوبيس 6 ساعات لأن المعاد المفروض كان 9 صباحاً و الأتوبيس جه حوالي الساعة 3 العصر
طبعاً إستهبال من الجامعة و عدم احترام مواعيد كالعادة
وصلنا المنوفية و طلع ان المشرفين مش عارفين احنا هانقيم فين بالضبط لأن لما جامعة المنوفية بعتت الفاكس قالت اننا هانقيم في المباني الجديدة اللي الجامعة بنيتها "مخصوص" علشان الأسبوع و الأتوبيس وصل هناك قالوا لأ البنات هايقيموا في مدينة الطلبة القديمة و الشباب هايقيموا في مدينة الطالبات
صباح العك و المسخرة
وصلنا مدينة الطالبات موجودة في شارع حسني مبارك و اللي قريب منه كوبري اسمه "كوبري حسني مبارك" برده و على الشارع من بره متعلق يافطه مرسوم عليها عربية كارو و مكتوب "ممنوع مرور النقل البطىء" و مع ذلك الشارع بالكامل مليان عربيات كارو
المنطقة المحيطة تعتبر ملتقى كذا طريق للعربيات و مع ذلك مفيش عسكري مرور واحد في المكان ده ينظم العملية و بالطبع ظهر عسكري المرور يوم مجىء "جمال مبارك" لكن يوم مجىء الريس محدش ظهر أصلاً غير بتوع أمن الدولة و الجيش و اللذي منه.

المنوفية بلد فاضية لأنها أكتر بلد طاردة للسكان إلي المدينة
و المناطق اللي كنا فيها في شبين كانت كويسة و هادئة و نظيفة (مش كلها قوي يعني)

يعد ما وصلنا مدينة البنات طلعنا الغرف و كانت أول صدمة هي الغرف
6 سراير في كل غرفة و الغرفة أصلاً ضيقة و وسخة جدا جدا جدا
و بما أن المعروف ان البنات أكثر نظافة من الأولاد فإن البنات لقوا أضعاف أضعاف القذارة اللي لقيناها في الغرف عندنا و عندهم قامت خناقات كتير من نوعية "لما الجامعة مش قد تنظيم الأسبوع بتنظموه ليه" و حاجات زي كده
احنا صورنا مستوى قذارة الغرف بس الصور هاتيجي قريب
و بما اننا في مدينة البنات لقينا جوابات حب و غرام و فلايات و كريمات و حاجات تانية
و بعد ما شتمنا في كل حاجة من قذارة الغرف للحكومة اللي مش قادرة تنظم حته اسبوع و آل ايه عاوزة يبقى عندها مفاعل نووي

نزلنا نتغدى و لقينا الغدا عبارة عن مكرونة محمرة و فاصوليا بيضا و لحم و ربع فرخة و زيتون و برتقاله
الحاجة الوحيدة اللي كانت كويسة في الأسبوع هو الغدا و انا هنا باتكلم عن الكميات مش الطعم
المكرونة دي كان طعمها وحش جداً و في الأيام اللي كان فيها أرز كان بيبقى شبه شايط
بعد ما اتغدينا قالولنا خدوا العشا معاكوا و انتوا طالعين و خدنا العشا و احنا طالعين لاقيناهم بيغسلوا الصواني اللي كنا بناكل فيها في طشط مليان مياه و صابون
جاتلي حالة غثيان و هما لما شافونا طالعين و معانا العشا قالوا "يادي المصيبة"

و طلعنا الغرف و بعد كده نزلنا نشتري فيشة لأن و سلك لأن الفيش مش موجودة في الغرف (مش فاهم ايه الحكمة) والراجل الكهربائي ضحك علينا و باعهلنا أغلى من القاهرة
و اتمشينا شوية في البلد نشتري حاجات و رجعنا و المفروض ان كل واحد ليه بطانيتيين لقيناهم ادولنا واحدة بس
لكن من التعب مكناش قادرين نعترض في الوقت ده و قلنا ننام
و نمنااااااااااااااا

أكمل معاكم بعدين

سلام

أسبوع تعذيب شباب الجامعات

رجعت الحمد لله من أسبوع تعذيب شباب الجامعات سليم

بعد تغيب عن كتابة أي بلوج أو موضوع و اتفرغت تماماً للشغل بتاعنا في أسبوع شباب الجامعات لبسنا خازوق بسبب الكوسة اللي كانت أوضح من الشمس في المسابقات.

الناس كلها بتقول إن ده فعلاً "أسوأ أسبوع شباب جامعات شفناه في حياتنا"

المهم ان انا لسه واصل دلوقتي و تعبان و مش قادر أجمع اللي هاكتب عنه (هاكتب عن ايه ولا ايه)

ماعلينا

ان شاء الله كلها يومين تلاته و اكتب كل حاجة حصلت

سلاحف