حبيبنا جامد و بيدينا - قاعد و مرتاح فوقينا

كان يوم أسوووود يوم ما جيييييت

كان يوم أسوووود يوم ما جيييييت

كان يوم اسوووووود

كان يوم اسوووووود

كان يوم أسوووود يوم ما جيييييت

على فكرة ماقصدش حد
ده واحد صاحبي عيد ميلاده النهاردة بجد
ههههههههههههههههههههههه

الإنترفيو الغامض

يوم غريب في الكلية
نازل من بيتنا الساعة سبعة و عشرة و المفروض ان اول محاضرة الساعة تمانية و نص
المشوار بياخد من ساعة لساعة و نص
للأسف مكانش فيه عربيات جيزة و اضطريت اني اركب مواصلة علشان اوصل للموقف و هناك استنيت لحد ما الميكروباص اتملى و طلعنا حوالي الساعة سبعة و نصف
وصلت الجيزة الساعة تسعة إلا ربع
ركبت ميكروباص لحد باب الكلية كمان
2 جنيه و خمسة و سبعين قرش علشان اوصل للباب ده و كمان يمكن المعيد اللي عامل شعره زي هتلر ميرضاش يدخلني
LOA
اطلع السكشن و ادخل و الاقي المعيد سايبني ادخل بس شكله كده عملها غصم عنه خاصة و ان نص السكشن خلص
قعدت و سألت صاحبي قاللي انه كان في بنت داخلة قبلي بدقيقة و الزبون (المعيد) اتكسف يمشيها و علشان كده برده الزبون اتكسف يمشيني علشان مايقولوش عليه كلمة عيب
يخلص السكشن
كوباية شاي من عند عم سعيد
حالة من الفوقان
سكشن تاني
المعيد اللي طالما أضحكتني تعبيرات وجهه في كل وقت
لما بيستغرب
لما بيضحك
لما بيتعصب
لما من غير أي حاجة خالص
و علشان كده السكشن ده كله باقعد مستخبي و عمال اضحك
يخلص السكشن و البريك
اقابل الولد اللي كنت عاوز احول مشروع التخرج مع مجموعته علشان الباشا يقوللي ان الدكتور رفض و "بشدة" ان أي حد يدخل المجموعة و الطلبة قالوله انهم اربعة بس و التكاليف هاتبقى عالية عليهم و برده الدكتور و بنفس الشدة رفض
ده معناه اني هاضطر استمر في المشروع اللي الإدارة حطوني فيه
I never accepted my fate
عندي بعد كده معمل
تفائلت خاصة و ان الجزء اللي هادرسه في المعمل ده هاستفيد منه لأني في حاجات في المنهج مش عارف اعملها و المفروض ان المعمل ده هايعلمهالي
اطلع لأجد الدكتور اللي رفض و "بشدة" دخولنا للمشروع عنده
للأسف الشديد الدكتور عنده
ADHD
و لأني زي الدكتور كده فباعرف الناس دي من بعد اول تصرف اشوفهم بيعملوه
ولأن أغلب المصريين مايعرفوش البتاع ده ايه اصلاً فمحدش هايقدر يعرف مدى المعاناة اللي واجهناها علشان نشغل التجربة و نخلصها
الدكتور عمال ينسى و يغلط و مش عارف ايه و بتاع
كل شوية يطلع في غلط في الحوار و نرجع نصلح تاني
عاوز أروح حرام عليك يا شيخ انا قدامي مشوار لآخر الدنيا
المفروض ان اطول معمل حضرته السنة دي قعدت فيه من الساعة اتناشر و نص للساعة اتنين و نص
الدكتور ده قعد معانا لتلاتة و نص
بعد ما خلصنا التجربة و انقذتهم من انهم يعيدوها من الأول بعد ملحوظة مني في خطوة ناقصة
ايه يا واد الحلاوة دي
المهم لقيت الدكتور عاوز آل ايه يسألنا كمان
ده غير التقرير اللي هانكتبه و نقدمهوله
السؤال الأول
انت كنت في مدرسة ايه في ثانوي
!!!!!!!!!!!!!!
و انت مال طنط
انا السؤال ده اتسألته من سبع سنين لما كنا لسه جداد في الكلية و بنقيم بعض عن طريق المدرسة و ساعتها كنت باقول اسم مدرستي لأنه كان بيدب الرعب في قلوب العدى
:D
و دلوقتي لما بقينا أجداد في الكلية لسه بأتسأله!
طبعاً جاوبناه
و الإجابة كانت بتجر سؤال عن المدرسة و المنطقة و اصل الدكتور واضح انه اجتماعي شوية فبيسألنا عن مدرسين ولا دكاترة ولا حتى واحدة فاتحة كشك هناك في المنطقة
طلع و بالصدفة انه في واحد معايا في التجربة كان معايا في المدرسة
سألني انت متعرفوش
- دكتور احنا في سنة أولى في مدرستنا كان فيه تلاتين فصل ده سنة أولى بس حضرتك
- يعني لو عائلة كاملة في المدرسة ممكن مايعرفوش بعض
و بعد السؤال ده طبعاً بدأ يسأل في التجربة و ساعات سأل ناس عن قرايبهم لو لقى في أساميهم حاجة مشابهه لحد يعرفه
واحد سأله والدك شغال ايه قاله في الإمارات
قعد يتكلم معاه شوية عن الإمارات خاصة و انه كان هناك
عاوز اروح حرام عليك يا أخي
واحد تاني طلع من بني سويف قعد يسأله لو كان يعرف ان الدكتور فلان من بني سويف برده
سبحان الله يا اخي
واحد ثالث مش عارف طلع منين
يقوم قايله ان مش عارف مين كان من بلد "جنب البلد دي" و انه كان فيه واحد قريب الشخص ده مع الدكتور في الإمارات ولا ليبيا و هو اللي قالهم كده
ما يندعق الأولاني على التاني على قريبه على ...
.......
المهم النتيجة اللي توقعتها انه يا اما الدكتور بيدور على عريس
أو انه شخص اجتماعي لدرجة مخيفة
خرجت من المعمل
أحمد الله على هذه النعمة
عزيزي البروفسور:
لو كنت معك في المشروع لكنت فقدت اعز ما أملك
حباك الله من علمه مزيداً بس بعيد عني
Now I can accept my fate
Blessed be...

أحلى يوم جمعة في حياتي

إرتبط يوم الجمعة عندي بالخنقه لأنه أجازة و أهلي بيبقوا موجودين
في أغلب أيام الجمع باصحى متأخر - يادوبك على ميعاد الصلاة - و لكني بأصحى على ريحة البخور اللي الست الوالدة بتطلعه و بتلف بيه الشقة في كل الغرف و بما إن غرفتي صغيرة فإنها أول ما بتدخل الريحة بتخليني أقوم متعكنن
- هو كل يوم جمعة لازم تصحوني بالريحة دي
- يعني ما نبخرش
- و لازمته ايه البخور يعني هو ده كمان سنة ؟
- ...... بيخلي ريحة الشقة حلوة
- أنا مش عاوز ريحة أودتي تبقى حلوة
- طب انزل الحق الصلاة

طبعاً يختلف السيناريو كل يوم جمعة إختلافاً بسيطاً و لكن النتيجة واحدة هي يوم سىء للغاية
و بما أن أهم ساعتين في اليوم هما أول ساعة بعدما تستيقظ و آخر ساعة قبل النوم فبكده يوم الجمعة بيبقى كله وحش جداً عليا
بعد ما بارجع من الصلاة بافضل قاعد جعان مستنيهم على ما يجهزوا الأكل لأن في الأيام العادية باصحى و أقلي بيضه و آكلها و أخلص لكن الأسرة موجودين كلهم و عاملين فطار وواقفين في المطبخ فمش هاعرف اعمل حاجة باضطر استنى
الفطار كان بييجي طبعاً في فول و طعمية و ده مش بيحصل غير يوم الجمعة بس فكنت باكل كتير
افضل طول اليوم مريح و مش عارف أركز من الأكل اللي كلته (راجع مسرحية المتزوجون لمعرفة تأثير الفول على الفرد و المجتمع)
مكنتش باعرف أذاكر
بطني مقلوبه طبعاً من المسلح اللي كلته و مهما أخدت من حاجات تساعد على الهضم مفيش فايدة
حتى الشغل مش باعرف أعمله

لكن النهاردة كان مختلف تماماً
يوم الخميس فضلت صاحي باذاكر لغاية الفجر و بعدين لما الست الوالدة قامت قلتلها بلهجة تحمل الهزار و التهديد في آن واحد
- مش عاوز بخور في أودتي الصبح يا ماما لو سمحتي انا عاوز بكره أذاكر
نظرت إلي نظرة التحدي المعروفة بين الآباء و الأبناء
- هاتعمل ايه يعني ؟؟؟
(هذا السؤال ليس إلا فخاً)!
- أنا قبل مانام كنت هاكتب ده على ورقة و اعلقها على الأوده علشان تشوفيها بس الحمد لله انك صحيتي
لو سمحتي بلاش بخور في أودتي و أنا نايم لما أنزل أصلي ابقي بخري أودتي ساعتها
- انت مش بتقول ان ريحته حلوة
- أيوة ريحته جميلة بس وهو مطفي أو بعد ما اصحى
دخلت لأنام و تاني يوم جاءت أختي لإيقاظي
- اصحى الناس في الجامع بتدعي
- بتدعي على مين ؟؟
استيقظت ووجدت الحاجة الوالدة راحت عليها نومه
هييييييييييييييييييييييييه
كنت سعيداً جداً و أثر هذا على يومي تأثيراً جميلاً جداً
ذاكرت كويس النهاردة الحمد لله
مكلتش كتير زي كل أسبوع
مارست اليوم كأي يوم عادي

المهم عاوز بس أقولكم على حاجة مهمة
فعلاً أهم ساعة في يومك هي أول ساعة بعد ما تصحى لو خليت الساعة دي جميلة هتلاقي يومك كله جميل
يعني
بلاش أخبار في الساعة دي
بلاش تليفزيون
بلاش أي حاجة ممكن تعكنن عليك
و الكلام ده يسري على أول ساعة في يومك و آخر ساعة قبل ما تنام
هانتكلم بالتفصيل عن الحاجات دي بعديييين

عودة النت الضال

إلي كل الأصدقاء اللي بيقروا البلوجات بتاعتي و اللي مش بيرضوا يعلقوا و اللي عرفت منهم انهم خايفين اتريق عليهم - كالعادة - و اللي كلهم سالوا عليا لما مكنتش موجود
النت رجع تاني
بعد ما جاري - الناصح - بوظ الراوتر عند واحد صاحبه - ناصح برده - راح يوديه للصيانة
كل ده من غير ما يقولي ولا يقول للتالت اللي معانا على النتورك و فضلت قاعد آكل في نفسي و مش عارف اوصله لأنه يا إما نايم أو مش موجود
أصله في السنوية العمومي
و أخيراً قاللي الخبر الوحش و فضلت مضطر أصبر لغاية اما يتصلح
و النهاردة بعد ما رجعت لفيت النت جه و الحمد لله
مش عارف أكتب ايه دلوقتي
الامتحانات قربت يوم 26
و قدمت و قبلت في نموذج جامعة الدول في الجامعة الأمريكية في مجلس الحوار الوطني و الإفتتاح كان امبارح
أكلت حواوشي امبارح برده من محل مضروب و بطني أعلنت الحرب
قاعد أقرا في أخبار أسبوع بحاله فاتني حاسس اني كنت منعزل عن الدنيا و اللي فيها
كان بقالي فترة رجعت فيها تاني للفلسفة بدون سبب بس هاسيبها اليومين دول علشان الامتحانات
علم النفس برده واخد مني حبتين لكن هانفضله لأني مش ناقص جنان الأيام دي
كادر المعلمين اللي اتكتب في الجرايد امبارح - مع قرب الإمتحانات - في محاولة للحكومة لتجنب قيام المدرسين بأي اعتصام أثناء الإمتحانات و المدرسين الغلابة هايصدقوا
ده طبعاً بغض النظر عن الكادر ذات نفسه
بس معلش انا برده عاوز انجح السنة دي ولازم اريح دماغي شوية علشان اعبيها مواد هندسة المجردة من أي تفكير

المهم انا مبسوط
و عاوزكم تتدعولي أنجح علشان ليكوا عزومة على سبورت كولا و سندوتش فول لكل واحد فيكوا
سلاحف

جحيماً يا أستاذ

شعري بقى قد كده (عدا المنطقة في المنتصف فهي تستعد لتتحول إلي صحراء جرداء) و لهذا كان من الضروري الحلاقة خاصة و أني لا أستطيع التركيز جيداً مؤخراً فكان لابد من الحلاقة
ذهبت عند حلاقي المعتاد و هو يعمل و معه ولداه واحد منهم في أواخر العشرينات و الآخر في التاسعة عشر
الثلاثة تبادلوا حلاقة رأسي في مراحلها المختلفة في حياتي
يعني لما كان شعري سايح و طويل و طبل و زمامير كان محتاج واحد خبرة علشان يظبطهولي لذا كان الأب هو من يقول بالحلاقة
و بعد بداية ظاهرة التصحر ما بدأت تدخل إلي رأسي أصبح الإبن الأكبر هو من يقوم بالعملية لأن شعري بقى لقمة سائغة بالنسبة له
و بعد ما التصحر أصبح هو الطبيعي في شعري و أيقنت أنه لا فائدة لذا قررت بأني سأقوم بسحلة كل مرة و حلاقته كله على بعضه لذا كان من الأفضل أن يقوم الإين الأصغر بهذه المهمة حيث أنها غير صعبة بالمرة مجرد أقعد و يجيب المكنة و تييييييييت و خلاص
والله مصلحة مش باضيع أي وقت خالص في الحلاقة

المهم النهاردة كان غريب لأن الإبن الأصغر مش موجود و عرفت أنه دخل الجيش
حلقلي الإبن الأكبر و هو بيفتكر أيام زمان لما كان شعري في أوج مجده و قعدنا نتكلم عن أخوه و الجيش و بالطبع و للأسف طالما جت سيرة الجيش بتيجي سيرة السياسية ثم سيرة الريص.
لا أذكر بالطبع الحديث كله أو من بدايته و لكن هذا كل ما اتذكر :
- كل المستثمرين بيحبوه لأنه سهلهم العملية أصله - لامؤاخذة يا أستاذ - قلع البلد اللباس و قالهم اعملوا اللي انتوا عاوزينه فيها والشعب كله بيكرهه و بيكره الحزب الوطني
و هنا تدخل والده و قال "ما انت في الحزب الوطني
- هو انت في الحزب الوطني ؟
- أنا أمين لجنة في الإنتخابات بس والله مش بمزاجي يا أستاذ
خرج والد الحلاق للصلاة بعد أن حاول أن يوقفه عن الكلام ثم زغده (يمكن يكون فاكرني أمن)
- يعني بتزور ؟ (قلتها بهزار) و ازاي يعني عضو مش بمزاجك؟ (انا عارف مسبقاً انهم بيضموا ناس قسراً زي أمناء اتحادات الطلاب في الجامعات)
- كنت في يوم رايح انتخب لقيت القاضي بيقوللي
- انت متعلم
- أيوة يا باشا معايا معهد كمبيوتر
- بتشتغل ايه
- حلاق
- طب بص يا ماهر دلوقتي مرشح الحزب الوطني - اللي هو هايكسب طبعا ً - مبعتليش أمين لجنة ولو مفيش أمين لجنة كل الأصوات دي هاتبقى باطلة، كل اللي انت هاتعمله انك هاتقعد معانا تبقى أمين اللجنة و هاتتغدى و هاتمضي و تاخد خمسين جنيه لما نخلص
- بس يا باشا أنا ورايا شغل.
- النهاردة الاتنين و انتوا أجازة ولا ايه ؟
طبعاً الحلاق ماتعرفش اتكسف ولا خاف ولا ايه بالضبط و اضطر يوافق و ازاي أصلاً أي حد يبقى أمين لجنة لكن إحنا في بلد المعجزات فمرضيتش أعلق
- جابولنا غدا محترم كان فيه نص فرخة و كنت شايف العيال قاعدين في اللجنة كل واحد ماسكله كشف بيسوده
- طب افرض حد جه و هما مسودين إسمه مش هايعرف ؟
- صعب أصلهم بيعملوا كده و الساعة حوالي خمسه و كمان ساعتها كانت انتخابات مجلس الشورى و مش كتير اللي بييجوا
عارف بالضبط يا أستاذ هي عاملة زي الإمتحانات بتاعت المدارس رئيس اللجنة يدخل و يقول للعيال غشوا و يخرج هو بره ده اللي كان بيحصل في الإنتخابات
العيال اللي ماسكين اللجنة كل واحد بياخد مثلاً بتاع 200 اسم يسودهم و يحطولهم الورق و أنا طبعاً مش قادر أتكلم و بليل لما خلصنا الصناديق مضيت و خدوا مني نمرتي و الضابط قالي آخد رقم موبايله و قالي "انت دلوقتي بقيت مننا و لو أي حاجة حصلتلك أو أي حد ضايقك بس اتصل بيا ، انت خدمتنا ولازم نخدمك"
و بعديها لقيتهم كلموني و قالولي آجي اعمل كارنيه الحزب و بقيت مكتوب عندهم ان انا أمين لجنة في أي انتخابات بس بعد كده بقيت أروح اللجنة بتاعتي في الآخر أمضي على الورق و أمشي و بليل مش بأروح آخد الفلوس لأنها فلوس حرام
- انت تعرف ان التزوير في الإستفتاء الأخير اتصور فيديو
- أيوة سمعت، انت متعرفش ايه اللي حصل عندنا هنا، رحت اللجنة في الاواخر كالعادة لقيت الضابط بيسلم عليا و يقولي تعالى أما أقولك العيال بنت ال(تيت) دي عملت ايه (قصده على اللي ماسكين اللجنة)
- الواد ابن (تيت) ده عمل كشفين (كشوف الناخبين) و الواد ابن ال(تيت) ده عمل كذا كذا كذا، دلوقتي احنا نقدر نعمل أي حاجة احنا عاوزينها من غير إذن نيابة يعني ممكن نصور الراجل و هو نايم مع مراته و نصوره في الحمام و هو من غير لباس و نقبض عليه في أي وقت و نعمل فيه اللي احنا عاوزينه ، الريص خدمنا و كان لازم نخدمه (يقصد التزوير طبعاً)
- بس يا أستاذ و تلاقي الناس في المجلس تقولك إن ده هايبقى عند الضرورة فقط الله يخرب بيوتهم
نعيماً يا أستاذ
- نعيماً ؟!

كما قال أخونا أيوب "نحن في الخراء حتى الأعناق...... لهذا السبب فقط نعيش مرفوعي الرؤوس"

The Landlord

Egypt.......rawks

Q: How are Egyptians nowadays?
A: They are hor nyyyyy

also they wrote Sandawiches


LMAO....this is a "big" company


no comment!!......hahaha


lol...why not?


this is a shop in egypt, they meant to translate "El Gens El Na3em"


don't they know what is the meaning?

ok, I think this post is funny enough
actually these "names" are due to wrong translation
I'll post some more soon.

Salam