يعني الكلام كان صح

أعلن حزب التجمع امبارح انه لن يشارك في إضراب 4 مايو القادم (زي ما رفضوا يضربوا برده في 6 ابريل) بحجة انهم معندهمش رجالة
اقصد بحجة انهم لن يشاركوا في إضراب غير معروف أهدافه ولا جهات تنظيمة!!!
ده بيؤكد فعلاً الكلام اللي سمعناه عن صفقة بين التجمع و الوطني للحصول على بعض المقاعد في المحليات و حتى انا قريت على الوعي المصري ان الحزب الناصري كان بيطلب من التجمع يتوسطله عن الوطني علشان كام كرسي
يا عيني على التجمع و الناصري
يا عيني على العمل الثوري
يا عيني على العمل البقري
يا عيني على أحزابك يا مصر
يا عيني على أحزانك يا مصر
لو كل واحد بطل يبص تحت رجليه و يبص لقدام و يشوف هو ممكن يكسب ايه لما البلد دي تتحرر
لكن الحمد لله ان كل واحد بيبان على حقيقته في الوقت المناسب
و مش بعيد نلاقي كمان بيان من الحزبين لتهنئة الريص بعيد ميلاده الثمانين و شكر خاص على مجهوداته في حفظ استقرار البلاد
و أثناء كتابة الكلمتين دول فيه حديث مع جيمي على الفضائية المصرية (توقيت مناسب جداً لإعادة ظهوره إعلامياً و من ثم بداية لحملة تلميع جديدة معروف أهدافها)
لكن بعيد عن شنباتكم جميعاً
ان شاء الله كلها فترة قليلة و تكون هربان بره يا جيمي
اتكلم براحتك بس احب أقولك ان الناس مبقتش تسمع
لأنهم جعانين و انتوا قضيتوا على الحاجة الوحيدة اللي كانت بتسكتهم
الناس كانوا عايشين على الفتافيت و ساكتين لكن دلوقتي معادتش الفتافيت موجودة
استحمل نتائج عمايلك يا نظيف
أصل القطنة ما بتكدبش

عودون أحمد

حاجات كتير بتحصل و انا معنديش وقت اكتب عنها
السؤال دلوقتي مابقاش هو الزعيم هايغور ولا لأ؟
السؤال بقى الزعيم هايغور امتى؟
......

مسألة وقت
و مش هاكرر كلام راتب عن دلائل نجاح إضراب 6 إبريل و بالرغم من إني بأختلف معاه في أنه سماه "محاولة الإضراب" دي مكانتش محاولة ده كان إضراب بجد
الإخوان المسنين فقدوا تعاطف غالبية الشعب معاهم و دي النقطة الوحيدة اللي كانت بتخلي الراجل ينتخب مرشحيهم و واضح ان الموضوع كان فيه صفقة ما بينهم و بين النظام - و أكيد النظام خانهم لأن الإعتقالات لم تتوقف و المحاكمة العسكرية اتحكم فيها - أو اصبحوا خايفين على مصلحتهم و بيبدوها على مصلحة البلد - زي باقي الأحزاب - و ده معناه ان المحاكمات العسكرية جابت نتيجة و اضرب المربوط يخاف السايب.
و بما أن الفيس بوك كان هو السبب الرئيسي لتعريف الناس بالإضراب فحسيت ان الحكومة ممكن تحجبه
إلا إني سمعت النهاردة ان الحكومة فعلاً بتفكر تحجبه (يعني هما هايجيبوا الغباوة من بره)
و ده لو حصل الحل هو في برنامج
TroPark
و دلوقتي هما عملوا باقة كاملة اسمها
XeroBank
و في برامج تانية كتير بتعمل نفس الوظيفة
توربارك ده اتعمل بالأساس لما الحكومة الصينية اعلنت عن حجبها لمواقع المعارضة و كمان بعد ما اشترطت على جوجل انها ماتحجبهاش مقابل عدم اظهار نتائج بحث معينة (مثل اسماء المعارضين السياسيين) و جوجل اضطرت انها توافق
قاموا بعض مطورين البرامج عملوا البرنامج ده علشان كل الناس تقدر تفتح المواقع المحجوبة
طبعاً احنا عارفين البدو بيستخدموا البرنامج ده في ايه

شرح سريع و بالبلدي لكيفية عمل البرامج دي
انت بتفتح البرنامج العادي بتاعك و بتكتب الموقع اللي عاوز تدخل عليه
البرنامج بيعمل ريكويست على مقدم الخدمة و مقدم الخدمة بيراجع الريكويست ده على فلتر و لو الموقع مش محجوب بيعرضه و لو محجوب بيظهرلك رسالة خطأ أو أي حاجة تانية
البرنامج اللي اتكلمت عنه ده بدل ما بيبعت الريكويست على مقدم الخدمة بيروح على سيرفر في مكان تاني و بطلب منه يعمل الريكويست بداله
الجهاز التاني (السيرفر) بيعمل الريكويست على مقدم خدمة مش بيعمل فلتره و يبعت البيانات على جهازك
طبعاً كل ده و مقدم الخدمة فاكر ان جهازك متصل على السيرفر البعيد ده بس و ميعرفش انه بينقلك البيانات من موقع محجوب
طبعاً أنا اشك في ان القرار ممكن يتنفذ بس الحرص واجب

الوصلات
http://xerobank.com/products.html
https://www.torproject.org/
http://letwist.net/operator

Le Atelier

هذه اللوحة وجدتها بالصدفة منذ فترة على احد المواقع
لا أعرف الفنان العبقري الذي استطاع وصف الأمر بصورة مثل هذه!!
اللوحة اسمها
Le Atelier

هندزة

إهداء إلي كل طلبة الهندزة
بالرغم من إن اللي عملت الفيديو بتعتذر للي بيحبوا الكلية
أنا بأقولهم اللي مش عاجبه ييجي يمسك

الإنترفيو الغامض

يوم غريب في الكلية
نازل من بيتنا الساعة سبعة و عشرة و المفروض ان اول محاضرة الساعة تمانية و نص
المشوار بياخد من ساعة لساعة و نص
للأسف مكانش فيه عربيات جيزة و اضطريت اني اركب مواصلة علشان اوصل للموقف و هناك استنيت لحد ما الميكروباص اتملى و طلعنا حوالي الساعة سبعة و نصف
وصلت الجيزة الساعة تسعة إلا ربع
ركبت ميكروباص لحد باب الكلية كمان
2 جنيه و خمسة و سبعين قرش علشان اوصل للباب ده و كمان يمكن المعيد اللي عامل شعره زي هتلر ميرضاش يدخلني
LOA
اطلع السكشن و ادخل و الاقي المعيد سايبني ادخل بس شكله كده عملها غصم عنه خاصة و ان نص السكشن خلص
قعدت و سألت صاحبي قاللي انه كان في بنت داخلة قبلي بدقيقة و الزبون (المعيد) اتكسف يمشيها و علشان كده برده الزبون اتكسف يمشيني علشان مايقولوش عليه كلمة عيب
يخلص السكشن
كوباية شاي من عند عم سعيد
حالة من الفوقان
سكشن تاني
المعيد اللي طالما أضحكتني تعبيرات وجهه في كل وقت
لما بيستغرب
لما بيضحك
لما بيتعصب
لما من غير أي حاجة خالص
و علشان كده السكشن ده كله باقعد مستخبي و عمال اضحك
يخلص السكشن و البريك
اقابل الولد اللي كنت عاوز احول مشروع التخرج مع مجموعته علشان الباشا يقوللي ان الدكتور رفض و "بشدة" ان أي حد يدخل المجموعة و الطلبة قالوله انهم اربعة بس و التكاليف هاتبقى عالية عليهم و برده الدكتور و بنفس الشدة رفض
ده معناه اني هاضطر استمر في المشروع اللي الإدارة حطوني فيه
I never accepted my fate
عندي بعد كده معمل
تفائلت خاصة و ان الجزء اللي هادرسه في المعمل ده هاستفيد منه لأني في حاجات في المنهج مش عارف اعملها و المفروض ان المعمل ده هايعلمهالي
اطلع لأجد الدكتور اللي رفض و "بشدة" دخولنا للمشروع عنده
للأسف الشديد الدكتور عنده
ADHD
و لأني زي الدكتور كده فباعرف الناس دي من بعد اول تصرف اشوفهم بيعملوه
ولأن أغلب المصريين مايعرفوش البتاع ده ايه اصلاً فمحدش هايقدر يعرف مدى المعاناة اللي واجهناها علشان نشغل التجربة و نخلصها
الدكتور عمال ينسى و يغلط و مش عارف ايه و بتاع
كل شوية يطلع في غلط في الحوار و نرجع نصلح تاني
عاوز أروح حرام عليك يا شيخ انا قدامي مشوار لآخر الدنيا
المفروض ان اطول معمل حضرته السنة دي قعدت فيه من الساعة اتناشر و نص للساعة اتنين و نص
الدكتور ده قعد معانا لتلاتة و نص
بعد ما خلصنا التجربة و انقذتهم من انهم يعيدوها من الأول بعد ملحوظة مني في خطوة ناقصة
ايه يا واد الحلاوة دي
المهم لقيت الدكتور عاوز آل ايه يسألنا كمان
ده غير التقرير اللي هانكتبه و نقدمهوله
السؤال الأول
انت كنت في مدرسة ايه في ثانوي
!!!!!!!!!!!!!!
و انت مال طنط
انا السؤال ده اتسألته من سبع سنين لما كنا لسه جداد في الكلية و بنقيم بعض عن طريق المدرسة و ساعتها كنت باقول اسم مدرستي لأنه كان بيدب الرعب في قلوب العدى
:D
و دلوقتي لما بقينا أجداد في الكلية لسه بأتسأله!
طبعاً جاوبناه
و الإجابة كانت بتجر سؤال عن المدرسة و المنطقة و اصل الدكتور واضح انه اجتماعي شوية فبيسألنا عن مدرسين ولا دكاترة ولا حتى واحدة فاتحة كشك هناك في المنطقة
طلع و بالصدفة انه في واحد معايا في التجربة كان معايا في المدرسة
سألني انت متعرفوش
- دكتور احنا في سنة أولى في مدرستنا كان فيه تلاتين فصل ده سنة أولى بس حضرتك
- يعني لو عائلة كاملة في المدرسة ممكن مايعرفوش بعض
و بعد السؤال ده طبعاً بدأ يسأل في التجربة و ساعات سأل ناس عن قرايبهم لو لقى في أساميهم حاجة مشابهه لحد يعرفه
واحد سأله والدك شغال ايه قاله في الإمارات
قعد يتكلم معاه شوية عن الإمارات خاصة و انه كان هناك
عاوز اروح حرام عليك يا أخي
واحد تاني طلع من بني سويف قعد يسأله لو كان يعرف ان الدكتور فلان من بني سويف برده
سبحان الله يا اخي
واحد ثالث مش عارف طلع منين
يقوم قايله ان مش عارف مين كان من بلد "جنب البلد دي" و انه كان فيه واحد قريب الشخص ده مع الدكتور في الإمارات ولا ليبيا و هو اللي قالهم كده
ما يندعق الأولاني على التاني على قريبه على ...
.......
المهم النتيجة اللي توقعتها انه يا اما الدكتور بيدور على عريس
أو انه شخص اجتماعي لدرجة مخيفة
خرجت من المعمل
أحمد الله على هذه النعمة
عزيزي البروفسور:
لو كنت معك في المشروع لكنت فقدت اعز ما أملك
حباك الله من علمه مزيداً بس بعيد عني
Now I can accept my fate
Blessed be...

إحدى مهارات المحادثة - الجزء الأول

في أثناء اهتمامي مؤخراً بدراسة العلاقات بين البشر قمت بتجميع بعض الأسألة التي يمكن سؤالها لأي حد عاوزين نعرفه أكثر.
بعض الملاحظات:
- اسأل فقط عدد قليل في كل مرة لأن دي مش انترفيو بتاعت شغل و ده ممكن يضايق الشخص.
- ممكن كمان تبعت سؤال بالايميل أو عن طريق رسالة على الموبايل كل كام يوم و ده هايخلي الموضوع أحسن و كأنه لعبة.
- ممكن سؤال واحد من دول يعمل مناقشة مدتها ساعة. يعني الأسألة دي مش معموله بنظام سـ و جـ و خلاص اتعود تناقش بأسلوب ظريف.
- ابعد تماماً عن رفض وجهة نظر الشخص لأن ده هايهدم العلاقة تماماً. كل شخص ليه الحق انه يعبر عن رأية بصراحة و بدون أي رد هجومي. وافق على وجهة نظره و عبر عن وجهة نظرك لو مختلفة.
- ابتسم دايماً و انت بتسأل (أو انت بتتكلم بصفة عامة) لأن ده ليه تأثير قوي في إستقبال الشخص لكلامك.
---------------------------------------------------------------------------------
1-
ما هو الـ....... المفضل لك؟
اللون
الفيلم
العطر
السنة الدراسية
الهدية
الموسم
المدينة
إسم فتى
إسم فتاة
موقع انترنت
نوع سيارة
طعام
أغنية
كتاب
معلم
ستايل الملابس
نوع الزهور
الدولة
برنامج تليفزيوني
مسلسل
حيوان
حلويات
مكان
مشروب
شِعر
مطعم
اجازة
محل
---------------------------------------------------------------------------------
2-
النشأة...
- أين ولدت؟
- أين عشت أثناء مرحلة الطفولة؟
- ما هي أكثر لحظات الطفولة التي تتذكرها؟
- ماهو أكثر شىء كنت تخاف منه و انت طفل (الظلام - وحوش خيالية ....الخ)؟
- ماذا كنت تريد أن تعمل عندما كنت طفلاً؟
- هل ماتزال تريد ان تعمل نفس العمل؟
- من كان مثلك الأعلى؟
- من كان بطلك المفضل (سوبرمان.......إلخ)؟
- ماذا كانت لعبتك المفضلة؟
- في أي مدرسة كنت؟
- ما هو أكثر شيىء مضحك حدث لك في طفولتك؟
- ما هو أكثر موقف شعرت فيه بالإحراج عندما كنت طفلاً؟
- ماهي أكثر نقاط التحول أحدثت تغييراً في حياتك؟
- ماهو أفضل شىء تتذكره لأمك أثناء الطفولة؟
- ماهو أفضل شىء تتذكره لوالدك أثناء الطفولة؟
- ماهي أفضل سنوات الدراسة بالنسبة لك؟ لماذا؟
- ماهو أصعب شىء حاولت تعلمه؟
- ماذا كانت لعبتك المفضلة؟
- من كان أفضل صديق لك أثناء الطفولة؟
- ماهي أكثر لعبة أعجبتك لكن لم تحصل عليها؟
- كيف اعتدت قضاء أجازة الصيف؟
---------------------------------------------------------------------------------
3-
عن الشخص في الوقت الحالي:
- يمكنك استخدام الأسألة السابقة أيضاً.
- ماهو أكثر الحيوانات أو الطيور يذكرك بنفسك؟ لماذا؟
- إذا كنت تستطيع الحصول على أي وظيفة في العالم. ماذا ستختار؟
- إذا استطعت الرجوع في الزمن و تغيير شىء ما. ماذا كنت ستغير؟ لماذا؟
- إذا قدر لك تحقيق ثلاث أمنيات. ماذا ستتمنى؟
- إذا ربحت اليانصيب. على أي شىء ستنفق الأموال؟
- ماهي أكثر شخصية كرتونية تذكرك بنفسك؟ لماذا؟
- ماهو أكثر هدف تود تحقيقه في حياتك؟
- إذا استطعت إيقاف عادة واحدة بك. ماذا ستختار؟ لماذا؟
- إذا كنت تستطيع امتلاك قوة سحرية واحدة. ماذا ستختار؟ لماذا؟
- ما هم أكثر ثلاث أشياء تفخر بهم؟
---------------------------------------------------------------------------------

أكمل بعدين لأني مشغول و تعبت من الكتابة.
في الواقع أنا كاتب الأسألة دي عندي بعدما جمعتها و أضفت عليها الكثير لكن كانت بالإنجليزي و ممكن تلاقوا أي أخطاء في ترجمتي لأن - للأسف - في بعض الكلام مكنتش عارف معناه بالعربي.
طبعاً الأسألة دي ممكن تتسأل بأكثر من أسلوب لكني انتقيت أكثر الأساليب إيجابية.

أحذر كل واحد عاوز يدرس العلاقات البشرية لأني بعد دراستي ليها اتغيرت كتير و قطعت الكثير من اتصالاتي و قاطعت بعض من أصدقائي و ممكن أبقى اتكلم عن ده بعدين.

القرد الذكي

يجكى أنه كان هناك قرد ذكي يعيش في غابة صغيرة.
في أحد الأيام وجد هذا القرد حصاناً حزيناً يبدو عليه المرض و كان يبكي.
- لماذا أنت حزين؟
- لقد أصبحت عجوزاً ضعيفاً ولم أعد قادراً على خدمة سيدي و لهذا طردني من المنزل و قال لي إن لم اعد له بنمر مربوط في ذيلي فإني لن استطيع أن أبقى عنده ثانياً.
- انتظر أنا لدي فكرة.
و ابتعد القرد عن الحصان إلي داخل الغابة و ذهب مباشرة إلي النمر.
- صديقي النمر لدي وليمة رائعة لك و كل ما عليك أن تفعله أن تأتي معي.
مشى النمر معه سعيداً و عندما اقتربوا من الحصان قال القرد:
- سأربط ذيلك بذيله و عندها لن يستطيع الحصان الهروب منك.
أعجبت الفكرة النمر ووافق عليها فوراً
بمجرد أن استمع الحصان للقرد استعد
اقترب القرد و بمجرد أن ربط الذيلين انطلق الحصان و جرى بكل قوته.
كان اليأس و حاجته الشديدة إلي العودة هما محركا الحصان العجوز لأنه يعلم جيداً أنه إذا لم ينجح فسوف تكون نهايته.
كانت المفاجأة ذات وقع قوي على النمر في البداية و بمجرد أن حاول يقاوم كان الحصان قد وصل لمنزل سيده الذي خرج من المنزل مسرعاً.
كان السيد سعيداً بأن حصانه نجح في التحدي و أعاده إلي المنزل مرة أخرى و قال له أنه كان "يختبر ذكاؤه" و ترك النمر الذي عاد للغابة سعيداً متعجباً.

الناس في بورما فاقت.....عقبالنا

الخبر عرفته من موقع Avaaz.org
تقع بورما تحت حكم العسكر من عام 1962 بعد قيام الجنرال "ني وين" بإنقلاب عسكري على النظام الجمهوري الديمقراطي في البلاد (منك لله ياللي في بالي) و ظل يحكم البلاد حوالي 26 عاماً (آي والله 26 عاماً) و تلاه بعد ذلك انتفاضة عرفت فيما بعد باسم انتفاضة 8888 بسبب تدهور الأحوال الاقتصادية (نتيجة طبيعية لحكم العسكر) و استمرت من 8 اغسطس حتى 18 سبتمبر 1988 و ردت عليها قوات الأمن بمذبحة دموية قتل فيها الآلاف .
قام الجنرال "ساو ماونج" بإنقلاب آخر أثناء هذه الأحداث و قام بتأسيس "مجلس إستعادة النظام و قانون الدولة" الذي فرض الأحكام العسكرية بشكل مؤقت تحت وعد بإقامة انتخابات حرة لمجلس النواب في 31 مايو 1989.
شهدت البلاد أول انتخابات حرة منذ 30 عاماً و كانت نتيجتها فوز حزب "الإتحاد القومي للديمقراطية" ب 392 مقعد من 489.
طبعاً تم اعلان رفض مجلس استعادة البتاع لنتيجة الانتخابات و تم إلغاؤها وظل المجلس يحكم الدولة بالحديد و النار.
تم تغيير اسم المجلس إلي "مجلس سلامة الدولة و التنمية" في عام 1997.
تقع زعيمة "الإتحاد القومي للديمقراطية" و هي "أونج سان سوو" (الفائزة بجائزة نوبل للسلام) تحت الإقامة الجبرية منذ عام 2003.
في يناير 2007 قامت كلاً من روسيا و الصين بالتصويت على مسودة لمجلس الأمن من أجل حث بورما على إطلاق سراح المعتقلين السياسيين.
فاض الكيل
الأحد 16 سبتمبر
بدأ الرهبان البوذيين بعمل مسيرة احتجاجية على المؤسسة العسكرية الحاكمة في البلد.
مع أنه المعروف عن الرهبان العزلة و انهم دايماً ملهومش علاقة بالعالم الخارجي.....المهم
تستمر المسيرة في ستة مدن في البلاد حتى الآن مع وعد من الرهبان بإستمرار المسيرة حتى سقوط الحكومة.
و وصل أعداد المتظاهرين إلي 100000.
الأهم ان الموقع عامل عريضة بيطالب فيها مجلس الامن و الصين بحث حكام بورما على التفاوض مع المتظاهرين بدلاً من استخدام السلاح زي ما حصل قبل كده.

أرجو من الجميع التوقيع على العريضة.

http://www.avaaz.org/en/stand_with_burma/d.php?cl=20005925

الخروج من شرنقة أخرى

لا أشعر بالرغبة في الكتابة منذ تاريخ الوفاة و حتى متابعتي اليومية أو الأسبوعية لتطبيقي لطريقة سيلفا بإنتظام منذ أكثر من 7 أشهر توقفت جزئياً.
و لكني لو توقفت عن الكتابة سأصاب بالجنون.

- ماتبقاش تقفل باب أودتك
هذا ما قالته لي والدتي بعد أن استلمت و بشكل مفاجىء قيادة الأسرة بعد أن كنت قد وضعت حدوداً في هذه العلاقة استغرق صنعها الكثير من الوقت.
فمع إختلاف الآراء و طرق التفكير حتى في أبسط الأمور و حتى أسلوب الحوار كان لابد من وضع هذه الحدود في التعامل.
- مش كل حاجة نتناقش فيها
- محدش يقوللي رأيه إلا لما أطلب منه
- أنتوا تقولوا اللي انتوا عاوزينه و أنا أعمل اللي أنا عاوزه
- دي حياتي و أمشيها زي مانا عاوز

و لذلك فأصبحت كل جلساتي مع والدتي و أختي للدعابة و المرح و مع والدي أضيف للحديث النقاشات السياسية و علم النفس.
و الآن و بعد خروجي من عدة شرنقات عديدة في هذا العام خرجت من شرنقة أخرى و بمعنى أدق شرنقتين
الشرنقة التي وضعتها للتعامل مع فئات معينة في المجتمع و الأهرى التي صممتها للتعامل مع أسرتي.

.أثناء رحلتي لإنهاء إجراءات المعاش قابلت أسوأ فئة في مجتمعنا و هم الإداريين العاملين في القطاع العام (و الخاص أيضاً)
و أصنفهم كالأسوأ فعلاً لأن هذا الجيل بصفة عامة ترعرع في عصر عبد الناصر المهزوم أي أنهم شربوا الخوف منذ نعومة أظفارهم و اعتادوا الخنوع و السلبية و الكسل.
- أنت بتتعامل مع بقر، لو البقرة نطحتك هاتنطحها ؟
هذا -بالحرف- ما قاله لي خالي بعد أن علم أني دخلت في مشادة كلامية عنيفة مع موظف في الحسابات بالإدارة (نادراً جداً ما أفقد التحكم في ردود أفعالي) و لكنهم لا "ينطحوا" لأنهم نعاج
صعدت بعدها بيومين "لإمضاء" و "ختم" بعض الأوراق و شاهدني و لم يقل شيئاً
دائماً ما أسأل نفسي هذا السؤال
Am I acting or reacting?

- أنا آسف جداً إني صحيتك من النوم
قلتها لموظفة الشيكات عند استلامي شيك مصاريف الجنازة و على وجهي إبتسامة باهته....لم تفهم بالطبع أنني أسخر منها .

البعض يقول أن هذا الجيل ضحية......خطأ
كل شخص مسئول عن حياته و مسئول عما يحدث بها.
و لكن الغالبية العظمى من الناس تتكاسل عن التحرك لتكون أفضل
و هذا هو الفرق بين الشخص الناجح في حياته و الآخر الذي يعيش على هامش الحياة

بعض الأحيان أتجادل مع والدتي و يكاد الحديث يتحول لمشادة كلامية أخرى
أسأل نفسي نفس السؤال مرة أخرى و يتخذ الحديث مساراً مختلفاً

لم يكن الأمر بهذا السوء الذي تخيلته في بادىء الأمر حتى بعد تهويل بعض أصدقائي للموقف.
آه أصدقائي

عرفت مَن مِن أصدقائي يهتم "فعلاً" لحالي و قام بتعزيتي و من منهم لا يهتم إطلاقاً
أشعر أن هذا التفكير سخيف فلا أحب الحكم على الآخرين و لكن هذه الفكرة بالذات لا تتوقف عن القفز أمامي.
هل سأتخذ إجراء مع هؤلاء الأصدقاء ؟؟ هذا يعتبر رد فعل
آه يا دماغي

كنا على وشك الإنتقال للعيش في إحدى المدن الجديدة و لكن حالة الوفاة أخرتنا أتابع الآن إكمال التجهيزات و كنت سأدعهم ينتقلوا وحدهم و أعيش بمفردي في شقتنا الحالية
محلاها عيشة العزاب
لكن الآن مضطر للخروج من الشرنقة و الإنتقال مع باقي الأسرة.

جلست يوم 23 يوليو في البيت زي ما اتفقنا و معرفتش ناس قد ايه قعدت بس موقع جبهة إنقاذ مصر قال أنهم كتير قوي.

كل هذه هي أفكاري في هذه اللحظة بس دلوقتي حسيت بإسترخاء لما كتبت (كالعادة)
دلوقتي قدامي حل من اتنين يا إما أقفل الويندو من غير ما أنشر البوست (زي مواضيع كتير قبل كده) أو أنشره و خلاص.

عودة النت الضال

إلي كل الأصدقاء اللي بيقروا البلوجات بتاعتي و اللي مش بيرضوا يعلقوا و اللي عرفت منهم انهم خايفين اتريق عليهم - كالعادة - و اللي كلهم سالوا عليا لما مكنتش موجود
النت رجع تاني
بعد ما جاري - الناصح - بوظ الراوتر عند واحد صاحبه - ناصح برده - راح يوديه للصيانة
كل ده من غير ما يقولي ولا يقول للتالت اللي معانا على النتورك و فضلت قاعد آكل في نفسي و مش عارف اوصله لأنه يا إما نايم أو مش موجود
أصله في السنوية العمومي
و أخيراً قاللي الخبر الوحش و فضلت مضطر أصبر لغاية اما يتصلح
و النهاردة بعد ما رجعت لفيت النت جه و الحمد لله
مش عارف أكتب ايه دلوقتي
الامتحانات قربت يوم 26
و قدمت و قبلت في نموذج جامعة الدول في الجامعة الأمريكية في مجلس الحوار الوطني و الإفتتاح كان امبارح
أكلت حواوشي امبارح برده من محل مضروب و بطني أعلنت الحرب
قاعد أقرا في أخبار أسبوع بحاله فاتني حاسس اني كنت منعزل عن الدنيا و اللي فيها
كان بقالي فترة رجعت فيها تاني للفلسفة بدون سبب بس هاسيبها اليومين دول علشان الامتحانات
علم النفس برده واخد مني حبتين لكن هانفضله لأني مش ناقص جنان الأيام دي
كادر المعلمين اللي اتكتب في الجرايد امبارح - مع قرب الإمتحانات - في محاولة للحكومة لتجنب قيام المدرسين بأي اعتصام أثناء الإمتحانات و المدرسين الغلابة هايصدقوا
ده طبعاً بغض النظر عن الكادر ذات نفسه
بس معلش انا برده عاوز انجح السنة دي ولازم اريح دماغي شوية علشان اعبيها مواد هندسة المجردة من أي تفكير

المهم انا مبسوط
و عاوزكم تتدعولي أنجح علشان ليكوا عزومة على سبورت كولا و سندوتش فول لكل واحد فيكوا
سلاحف

جحيماً يا أستاذ

شعري بقى قد كده (عدا المنطقة في المنتصف فهي تستعد لتتحول إلي صحراء جرداء) و لهذا كان من الضروري الحلاقة خاصة و أني لا أستطيع التركيز جيداً مؤخراً فكان لابد من الحلاقة
ذهبت عند حلاقي المعتاد و هو يعمل و معه ولداه واحد منهم في أواخر العشرينات و الآخر في التاسعة عشر
الثلاثة تبادلوا حلاقة رأسي في مراحلها المختلفة في حياتي
يعني لما كان شعري سايح و طويل و طبل و زمامير كان محتاج واحد خبرة علشان يظبطهولي لذا كان الأب هو من يقول بالحلاقة
و بعد بداية ظاهرة التصحر ما بدأت تدخل إلي رأسي أصبح الإبن الأكبر هو من يقوم بالعملية لأن شعري بقى لقمة سائغة بالنسبة له
و بعد ما التصحر أصبح هو الطبيعي في شعري و أيقنت أنه لا فائدة لذا قررت بأني سأقوم بسحلة كل مرة و حلاقته كله على بعضه لذا كان من الأفضل أن يقوم الإين الأصغر بهذه المهمة حيث أنها غير صعبة بالمرة مجرد أقعد و يجيب المكنة و تييييييييت و خلاص
والله مصلحة مش باضيع أي وقت خالص في الحلاقة

المهم النهاردة كان غريب لأن الإبن الأصغر مش موجود و عرفت أنه دخل الجيش
حلقلي الإبن الأكبر و هو بيفتكر أيام زمان لما كان شعري في أوج مجده و قعدنا نتكلم عن أخوه و الجيش و بالطبع و للأسف طالما جت سيرة الجيش بتيجي سيرة السياسية ثم سيرة الريص.
لا أذكر بالطبع الحديث كله أو من بدايته و لكن هذا كل ما اتذكر :
- كل المستثمرين بيحبوه لأنه سهلهم العملية أصله - لامؤاخذة يا أستاذ - قلع البلد اللباس و قالهم اعملوا اللي انتوا عاوزينه فيها والشعب كله بيكرهه و بيكره الحزب الوطني
و هنا تدخل والده و قال "ما انت في الحزب الوطني
- هو انت في الحزب الوطني ؟
- أنا أمين لجنة في الإنتخابات بس والله مش بمزاجي يا أستاذ
خرج والد الحلاق للصلاة بعد أن حاول أن يوقفه عن الكلام ثم زغده (يمكن يكون فاكرني أمن)
- يعني بتزور ؟ (قلتها بهزار) و ازاي يعني عضو مش بمزاجك؟ (انا عارف مسبقاً انهم بيضموا ناس قسراً زي أمناء اتحادات الطلاب في الجامعات)
- كنت في يوم رايح انتخب لقيت القاضي بيقوللي
- انت متعلم
- أيوة يا باشا معايا معهد كمبيوتر
- بتشتغل ايه
- حلاق
- طب بص يا ماهر دلوقتي مرشح الحزب الوطني - اللي هو هايكسب طبعا ً - مبعتليش أمين لجنة ولو مفيش أمين لجنة كل الأصوات دي هاتبقى باطلة، كل اللي انت هاتعمله انك هاتقعد معانا تبقى أمين اللجنة و هاتتغدى و هاتمضي و تاخد خمسين جنيه لما نخلص
- بس يا باشا أنا ورايا شغل.
- النهاردة الاتنين و انتوا أجازة ولا ايه ؟
طبعاً الحلاق ماتعرفش اتكسف ولا خاف ولا ايه بالضبط و اضطر يوافق و ازاي أصلاً أي حد يبقى أمين لجنة لكن إحنا في بلد المعجزات فمرضيتش أعلق
- جابولنا غدا محترم كان فيه نص فرخة و كنت شايف العيال قاعدين في اللجنة كل واحد ماسكله كشف بيسوده
- طب افرض حد جه و هما مسودين إسمه مش هايعرف ؟
- صعب أصلهم بيعملوا كده و الساعة حوالي خمسه و كمان ساعتها كانت انتخابات مجلس الشورى و مش كتير اللي بييجوا
عارف بالضبط يا أستاذ هي عاملة زي الإمتحانات بتاعت المدارس رئيس اللجنة يدخل و يقول للعيال غشوا و يخرج هو بره ده اللي كان بيحصل في الإنتخابات
العيال اللي ماسكين اللجنة كل واحد بياخد مثلاً بتاع 200 اسم يسودهم و يحطولهم الورق و أنا طبعاً مش قادر أتكلم و بليل لما خلصنا الصناديق مضيت و خدوا مني نمرتي و الضابط قالي آخد رقم موبايله و قالي "انت دلوقتي بقيت مننا و لو أي حاجة حصلتلك أو أي حد ضايقك بس اتصل بيا ، انت خدمتنا ولازم نخدمك"
و بعديها لقيتهم كلموني و قالولي آجي اعمل كارنيه الحزب و بقيت مكتوب عندهم ان انا أمين لجنة في أي انتخابات بس بعد كده بقيت أروح اللجنة بتاعتي في الآخر أمضي على الورق و أمشي و بليل مش بأروح آخد الفلوس لأنها فلوس حرام
- انت تعرف ان التزوير في الإستفتاء الأخير اتصور فيديو
- أيوة سمعت، انت متعرفش ايه اللي حصل عندنا هنا، رحت اللجنة في الاواخر كالعادة لقيت الضابط بيسلم عليا و يقولي تعالى أما أقولك العيال بنت ال(تيت) دي عملت ايه (قصده على اللي ماسكين اللجنة)
- الواد ابن (تيت) ده عمل كشفين (كشوف الناخبين) و الواد ابن ال(تيت) ده عمل كذا كذا كذا، دلوقتي احنا نقدر نعمل أي حاجة احنا عاوزينها من غير إذن نيابة يعني ممكن نصور الراجل و هو نايم مع مراته و نصوره في الحمام و هو من غير لباس و نقبض عليه في أي وقت و نعمل فيه اللي احنا عاوزينه ، الريص خدمنا و كان لازم نخدمه (يقصد التزوير طبعاً)
- بس يا أستاذ و تلاقي الناس في المجلس تقولك إن ده هايبقى عند الضرورة فقط الله يخرب بيوتهم
نعيماً يا أستاذ
- نعيماً ؟!

كما قال أخونا أيوب "نحن في الخراء حتى الأعناق...... لهذا السبب فقط نعيش مرفوعي الرؤوس"

مشهد

مشهد من إجتماع لمجلس النواب بجمهورية الموز يتحدثون عن قرارات زعيمهم
نائب 1 : إحنا مع قرار الزعيم الحكيم
النواب : إحنا مع الحكيم
نائب 2 : إحنا مع قرار الزعيم الرصين
النواب : إحنا مع الرصين
!

مع عدم الإعتذار لأي أرنب

يا جنينة الحيوانات - يا مصر

أيوة أنا باحب جنينة الحيوانات
رحتها قريب مع أصدقائي في المنتدى بعدما ألحيت عليهم علشان أشوف و أوريهم قرايبي القرود :)
كان بقالي حوالي 6 سنين مشفتش الحديقة فيها خالص
الحديقة اتغيرت
و القرود اتغيرت
فعلاً، القرود كانت بتبص للناس نظرة كلها كبرياء و تعالي و كأن القرود هي اللي بتتفرج على الناس مش العكس
و الناس بتتفرج و مستمتعين لكن الهم و الكآبه باينين على وشهم (إحنا السبب لأننا أرانب)
انحط مستواكم أيها الأرانب و أصبحتم أقل من القرود

و الصورة دي كانت اجمد حاجة في الجنينة
كل ما أشوفها أفطس من الضحك

لا تعليق

الكوميديا السوداء في بلدي

لم أستطع مقاومة شعوري بالإحباط فور رؤيتي لهذا الفيديو



و لم أستطع أيضاً مقاومة الضحك

و لم أستطع اقناع والدي بمقاطعة هذا الـ "إستفساء"!
و عندما ذهب ووجد صديق له يعمل مراقباً في إحدى اللجان و قال له هذا الصديق "تعالى انتخب هنا و سود بدل أي إسم" مما أثار دهشة السيد الوالد
هؤلاء هم مراقبوا إنتخابات المستقبل

سحقاً لكم جميعاً
سحقاً لكم جميعاً
سحقاً لنا جميعاً

أيها الأرانب لقد جائكم الذئب داخل مخابئكم
و لم تعد الحفر آمنه بعد الآن

Egypt.......rawks

Q: How are Egyptians nowadays?
A: They are hor nyyyyy

also they wrote Sandawiches


LMAO....this is a "big" company


no comment!!......hahaha


lol...why not?


this is a shop in egypt, they meant to translate "El Gens El Na3em"


don't they know what is the meaning?

ok, I think this post is funny enough
actually these "names" are due to wrong translation
I'll post some more soon.

Salam